Quote on language
 
-வருணன்
இந்த வலைப்பூவை (Blog) தொடர்ந்து வாசித்து வருகிற நண்பவர்களுக்கு இந்த தலைப்பு சற்றே பரிச்சயமானது போல தோன்றலாம். உண்மையிலேயே அவ்வாறு இருப்பின் நீங்கள் அதிக கவனத்துடனே வெளியாகிற கட்டுரைகளை வாசித்து வருகிறீர்கள். வாழ்த்துக்கள். ஞாயிறு தோறும் எழுதப்படும் இப்பத்தியின் (பத்தி– Coloumn) முதல் கட்டுரையின் தலைப்பு ‘மனிதரும், மொழியும்’ என்பதாக இருந்தது. இக்கட்டுரையின் தலைப்பும் ஏறதாழ அதே போல இருப்பது போல தோன்றலாம். முதல் கட்டுரையானது மனித வாழ்க்கைக்குள் மொழி எப்படி நுழைந்து பரிணமித்தது என்பதை வரலாற்று பின்னணியில் சுருக்கமாக முன்வத்தது. அதனைப் போல் அல்லாமல் இக்கட்டுரையின் மையப் பொருளாக மனிதர்களால் கையாளப்படுகிற மொழியானது அவர்களால் என்னென்ன மாற்றங்களுக்கு உள்ளாகிறது என்பதைக் குறித்து நாம் அவதானிக்கலாம்.
மொழி என்பது மனிதக் கண்டுபிடிப்புகளின் மகத்தானது, முக்கியமானது என்பதனை முன்னரே பார்த்தோம். கருத்துகளைப் பகிர்ந்து கொள்ள மொழி என்பது ஒரு அற்புதமான ஊடகம் (medium). மனிதர்களின் கலாச்சாரமும், பண்பாடும், சமூக சிந்தனையும் அவர்கள் பேசக் கூடிய ஒரு மொழியில் பெரிய அளவிலான மாற்றங்களை உருவாக்குகிறது. காலந்தோறும் ஒரு  மொழி அடையும் மாற்றங்கள் நிச்சயமாக அதனைப் பேசுகிற மனிதர்களின் ஒட்டு மொத்த சமூக மாற்றத்தின் கண்ணாடியாக இருக்கும் என்பதில் சந்தேகமே இல்லை. ஒரு மொழியை அடைந்த மாற்றங்களை கவனமாக ஆய்வு செய்தாலேயே ஏறத்தாழ அச்சமூகத்தின் வரலாற்றையே புரிந்து கொள்ளும் சாத்தியங்கள் இருப்பது உறுதி. மொழியானது ஏன் தொடர்ந்து ஆய்வு செய்யப்பட வேண்டும் என்பதற்கான மிக முக்கியமான காரணங்களில் இது முதன்மையானது.
மொழியியலில் (Linguistics) மொழியியல் அகழாய்வு (Linguistic archeology)  என்று ஒரு துறை இருக்கிறது. பொதுவாக மொழியியல் ஆய்வுகளின் ஒரு மொழியில் பயன்படுத்தப்படுகிற சொற்களைக் குறித்த ஆய்வுகளில் சொற்களின் மூலம் குறித்த ஆய்வுகள் மிக பரவலாக செய்யப்படுவது. மொழியியல் துறையில் Etymology என்பது மிக முக்கியமான ஒரு அம்சம். ஒரு வார்த்தையின் வேரை நோக்கிய ஆய்வாகவும், அந்த வார்த்தையின் அர்த்தங்கள் காலந்தோறும் எப்படி மாறி வந்திருக்கிறது என்பது குறித்த ஆய்வாகவும் இது இருக்கிறது. வேர் சொற்களை (Root words) தேடுகிற ஒரு பயணமாக இது இருக்கிறது.
ஒரு மொழியில் ஏற்படும் மாற்றங்கள், சேரும் புதிய வார்த்தைகள், புழக்கத்தில் இருந்து மெள்ள மறையும் சொற்கள் ஆகிய அனைத்தும் அம்மொழியைப் பேசுகிற மாந்தர்களின் வாழ்வியலோடு மிக நெருக்கமான தொடர்புடையன. மனிதர்களின் வாழ்வியலே அவர்கள் புழங்கும் மொழியின் போக்கையும், அதில் ஏற்படும் மாற்றங்களையும் தீர்மானிக்கிறது. எனவே ஒரு இன வரலாற்றை அறிந்து கொள்ள நாம் அவர்கள் பேசிய, பேசுகிற மொழியை ஆய்வு செய்வது ஒரு நல்ல வழிமுறையாக இருக்கிறது. பல நேரங்களில் உலகெங்கிலும் பல்கலைகழங்களில் இருக்கும் துறைகளில் (Departments) ஒரு சில வழக்கில் இல்லாத மொழிகளுக்குக் கூட தனியே துறைகள் இருப்பதைக் காணலாம். அவற்றின் அவசியமும் தேவையும் என்ன என்று எடுத்துச் சொல்வதே இந்த கட்டுரையில் நோக்கம்.
ஒரு மொழியானது ஏன் தீவிரமான ஆய்வுக்கு உள்ளாக்கப்பட வேண்டுமென்பதற்கு பல முக்கியமான காரணங்களையும் இச்சிறு கட்டுரையின் வழியாக நாம் அறிந்து கொண்டோம். ஒரு மொழியென்பது அதனைப் பேசும் இனத்தின் அடையளமாக மட்டுமல்ல, அந்த இனத்தின் வரலாறாகவும் இருக்கிறது என்பதாலேயே அதனை ஆய்வு செய்வது மிக முக்கியமானதாக மாறுகிறது.
ஆனால் மேற்சொன்ன ஆய்வுகளை மேற்கொள்வதற்கு மிக பெரிய தடையாக இருப்பது மொழிக் கலப்பு என்று சொன்னால் அது சற்றே நமக்கு ஆச்சரியமான காரணமாகத் தோன்றலாம். ஏன், சும்மாவேனும் தேடிக் கண்டுபிடித்து சொல்லப்படுகிற ஒரு காரணம் என்று கூட மனதிற்குள் நினைத்திட வாய்ப்புள்ளது. ஆனால் அது தான் யதார்த்தம்.